Von Erika Hugentobler-Lützelschwab, Magden
Am 28. schtimme mir über wichtigi Sache ab. D Zyt zum sich drüber informiere, wird langsam knapp. Eigemietwärt: nei oder jo? D Froog isch, wär profitiert drvo? Sit 1915 isch das e fiktivi Schtüür. Für Eigeheimbsitzer mit wenig Hypothek tüür. Drmit me als Pensionierte günschtig cha wohne, würd sich es Huus ohni Hypothek lohne. S Läbe lang hett me gschafft und gschpart, dass me im Alter e bitz besser «fahrt». Grad dopplet gschtroft bisch als Ehepaar. S Schplitting isch nit logisch und au nit klar! I dr Abschtimmig isch s Wort «Eigemietwärt» verschwunde, drfür hett me «Zwoitliegeschafte» in Tegscht ibunde. Wöttsch, dass dr Eigemietwärt nit tuet bliebe, muesch drum es «Jo» uf e Zettel schriebe! Wöttsch e E-ID: Jo oder Nei? Was bringt die? Me ghört allerlei. Im App «swiyou» chönn me sich regischtriere, d Date über Di sälber so nümm verliere! Das ganze choschtet Di schients kei Schtutz. Verschproche wird dr gröschtmöglichi Schutz. Aber dagtäglich wärde doch Firme ghackt. Au s Bundeshuus hett me jo scho knackt. Und, gwüssi Sache tuet me em Bürger verschwiege: Wird d E-ID agnoh, muesch explizit schriebe, dass bim Tod dini Organ im Körper bliebe. Mi Empfählig: Säg lieber «Nei», drmit mir nit die totali Überwachig hei!
Wer in de Gmeinde in Zuekunft s Zepter schwingt, gsehnd mir denn, wem d Wahl glingt. Nur die Beschte si für die Ämter empfohle, drum tue ihri Näme uf e Wahlzettel «mole». Wöttsch do drüber mis Fazit: Ich hoff, dass es die rächte git! Zum Pumptrack han ich mi «Sänf» scho geh, wies wyter goht, wird me denn gseh!
